Әтнә районында Конституция көне: техникум студентлары хокукый уенда белемнәрен тикшерделәр
Россиянең төп дәүләт бәйрәмнәренең берсе — Конституция көне алдыннан Үзәк китапханә хезмәткәрләре Әтнә авыл хуҗалыгы техникумы студентлары өчен интеллектуаль уен уздырдылар.
Уен барышында катнашучылар Конституциянең барлыкка килү тарихы һәм илнең төп законы структурасы белән таныштылар, гражданнарның хокуклары һәм бурычлары турында фикер алыштылар, шулай ук Россиянең төп дәүләт символларын, аларның әһәмиятен искә төшерделәр.
Чара дәвамында яшьләр өчен тематик күргәзмә эшләде. Ә ахырдан һәр катнашучы үз куллары белән истәлекле брошь ясады.
Әлеге чара "Пушкин картасы" федераль проекты, "Татарстан Республикасында дәүләт милли сәясәтен тормышка ашыру" дәүләт программасы кысаларында һәм "Гаилә" милли проектының "Гаилә кыйммәтләре һәм мәдәни инфраструктура" федераль проекты максатларына һәм бурычларына туры китереп үткәрелде.