Әтнәдә – Теләчеләр

Үзара әңгәмәдә:

– Биредә терлекләрне тәрбияләү шартларыннан  ак көнчелек бе­лән көнләшәм, – диде Теләченең авыл хуҗалыгы һәм азык-төлек идарәсе җитәкчесе Ралиф Низаметдинов. Соңыннан:

– Әйбәт ысулга ох­шаган, – дип нәтиҗә ясады.

Ралиф Низаметдинов 30 ел буе авыл хуҗалыгы өлкәсендә эшли. Җи­тәк­челек стажы 20 елдан артык.

– Терлекнең ясалма орлыкландыру ысулы аша туганлыгы күренеп тора. Гәүдә төзелешен карау да җитә, – ди.

Теләчеләрнең максаты – бездәге тәрбия шарт­лары белән танышып, кайсыдыр өлешләрен үзләренә кабул итү. Теләче районының Муса Җәлил исемендәге ҖЧҖ җитәкчесе сүзләре белән әйтсәк:

– Әлбәттә, һәр районда, хәтта хуҗалыкта – тәрбия шартлары үзенчәлекле. Теләчедә салкын ысул белән тәрбияләүгә өстенлек бирүчеләр күп. – Ә менә “Вамин-Теләче” агрофирмасы җитәкчесе Хәйрулла Хәсәншин Әтнәдә гамәлгә кергән “Себер ысулы” турында югары фикердә.

– Торакка кереп, тер­леккә күз салуга ук тәр­бия ысулы хакында ниндидер фикергә килеп була, – диде ул.

Салам аслыкта күшәп ятучы, кардада салмак кына әрле-бирле йөрүче сыерларны күргәч шулай диде. Терлекнең физиологик халәтен, тышкы кыяфәтен карап та тәрбия ысулын бәяләп була дип саный.

– Таза гәүдәле терлек авыру була алмый, димәк, продукцияне дә мул би­рә, – дип саный.

Кунакларның кайбер­ләре белән аралашырга өлгердем. Күпчелек: “Мондый ысулны тормышка ашыру өчен хуҗалыкның инвестор ярдәменнән башка яшәве кирәк”, дигән фикердә. Әтнә районының авыл хуҗалыгы һәм азык-төлек идарәсе җитәкчесе Хәмит Галимҗанов та шул хакта әйтеп узды.

– Әлеге ысулга күчү – озак процесс. Бездә ул күптән башланды. Бүген дә район хуҗалыклары үз мөмкинлекләренә карап ферманың иске торакларын үзгәртәләр, яңаларын булдыралар, – диде.

Шунысы бәхәссез, тәрбиянең бездәге ысулы инде уңай нәтиҗәләрен бирә. Көн саен бер баш сыердан сөт саву, дәүләткә сату күләме арту шуны дәлилли.