Әтнә сәхнәсендә – йолдызчыклар

«Созвездие-Йолдызлык» җыр-фестиваленең гала концерты булып узды.
Әлеге фестивальне көтеп алабыз. Шуңадамы тамаша залында алма төшәрлек тә урын юк иде. Хәтта кырыйга урындыклар куярга туры килде. Аннары балалар арасындагы матурлыкны, самимилекне, җыр-биюгә булган сәләтлеләрне үз эченә сыйдыргангамы, һәрвакыт нинди дә булса яңалык көтәбез. Яшь талантларны күреп шатланабыз, алар белән горурланабыз. Быел да чыгыш ясаучылар сәхнә тотты: каушамадылар, оялмадылар, матурлар, чөнки барысы да үзебезнекеләр.
Һәр елдагыча фестивальгә зур өметләр багладык. Бу көнне Әтнә дәүләт драма театры бинасы кырмыска оясын хәтерләтте. Әти-әниләр, укытучылар, мәдәният хезмәткәрләре, сәнгать мәктәбе укучылары, укытучылары – берәү дә читтә калмады.
Тик... Менә шул тик булмаса икән. Юк шул, нәрсәдер җитеп бетмәде.Коймакның эче пешми калды. Катнашучылар турында бары “Булдырдыгыз” диясем генә килә. Һәркем көченнән килгәнчә әзерләнгән. Шушы фестивальгә дип яңа кием тектерүчеләр дә бар иде. Елның-елында чыгышларында ниндидер үзгәлек булган бәрәскәләр, кышлаулар, күңгәрләрне быел да зур кызыксыну белән карадык. Фестиваль җыр-бию һәм җиңүчеләрне бүләкләү белән үрелеп барды. Теләчедә узасы зона бәйгесендә чыгыш ясарга тиешлеләр дә нәкъ менә шушы көнне генә билгеле булды. Аларга дипломнар белән берлектә чакыру кәгазе дә тапшырылды.