ЕГЕРМЕ МЕҢНЕҢ БЕРСЕ
“Волонтер” сүзенең инглиз теленнән тәрҗемәсе – үз теләге белән ярдәм итүче. Фәрдия дә шул рәвешле дөньякүләм чараны уздыруга үз өлешен кертергә җыена. Ул җиңел атлетика секциясендә эшләячәк.
– Узган елны “Авыл яшьләре җыены” үтте, анда Казанда узачак Универсиаданың башкарма дирекциясе вәкилләре дә катнаштылар. Җыеннан өйгә кайтуга, алар әйткән адрес буенча, волонтер булырга теләк белдереп онлайн- гариза яздым, – диде ул.
Башлангыч әнә шул вакыттан юл ала. Бу сүз колакка ят яңгыраса да, чит илләрдә бер генә чара да волонтер ярдәменнән башка узмый. Әлбәттә, инглиз телен белә – онлайн режимда җибәрелгән тестларның барысын да, ә февраль аенда рекрутинг үзәгендә әңгәмә узган. Шул вакытта ук аның волонтер булып сайлану мөмкинлеген сиздерәләр, март аенда телефоннан шалтыратып, раслыйлар. Ә бит волонтерлыкка сайлауда да конкурс зур – нәкъ уку йортына кергәндәге кебек.
– Универсиадада волонтер булып эшләргә теләүчеләр саны үзебезнең Татарстаннан гына да 60 меңнән артык иде, Әле бит чит төбәкләрдән килүчеләр бар. Барлыгы 20 мең волонтер сайлап алдылар. Арада мин дә бар, – дип елмая.
Апрель урталары узгач, Фәрдия аккредитация узып, махсус униформа алачак. Аннан соң махсус өйрәнүләр – тренинглар башлана.
– Волонтер булуның өстенлекләре дә күп, – ди ул. – Ярышларны турыдан-туры карау, инглиз телен шомарту, кем беләндер дуслашу һәм, әлбәттә, файдалы очрашуларда катнашу мөмкинлеге.
Фәрдия инде эш мәсьәләсен дә хәл итеп куйган, отпускасы шул вакытка туры килә. Казанда ул 30 июньнән 18 июльгә кадәр эшләячәк.