ӘХЛ тәмам. Күәм – чемпион!

Узган атнаның якшәмбе көнендә ӘХЛның Әтнә-Бәрәскә командалары очрашуын ахыргача карап бетереп булмады. Хоккейчылар арасында туган үзара бәхәс аркасында уен туктатылды, ике команда да ӘХЛдан чыгарылды. Нәтиҗәдә, беренчелек һәм кубок өчен көрәшне 4 команда гына дәвам итте. Ниһаять, ӘХЛ финиш сызыгын үтте. Күәм командасы үзенең җиңүләр багажын тагын икегә арттырып, аларның санын алтыга җиткерде. Чемпионат барышында команда тигез, матур уеннар белән сокландырды. Нәтиҗәдә, чемпион исемен яулады. Шашы командасы да һәртөрле мактау сүзләренә лаек (соңгы матчта җиңелү инде бернинди әһәмияткә ия түгел иде). Өч тапкыр җиңеп, Шашы командасы II урын алды. III урын иясе төп көндәше белән очрашуда призлы урынга керү мөмкинлеген куркыныч астына куйган иде, Мәңгәр – Күңгәр очрашуы хоккей өчен дә сирәк – 6:7 исәбе белән тәмамланды. Әлеге матчның ни дәрәҗәдә киеренке булуын чамалагансыздыр.  Әмма Мәңгәрнең Шашы командасын җиңүе бернинди бәхәссез тулы картинаны күзаллау мөмкинлеге бирде.