Әләшә бәйрәме

3 июнь көнне Әтнә төбәгенең тарихи Кала тавында Әләшә бәйрәме узды. Әлеге бәйрәм үзенең тамырлары белән борынгы тарихыбызга барып тоташа. Җәй башында - сыерчык бала очырган атнаның җомгасында бөтен төбәк халкы бирегә зур җыенга җыела торган булган. Әби-бабаларыбыз мул уңыш, имин тормыш теләп дога кылганнар. Бүгенге көндә Әләшә бәйрәменең елдан-ел күбрәк халыкны үзенә җыюы, район, төбәк массштабларыннан чыгып, республикакүләм төс ала баруын күрү аеруча куанычлы. Быел да бәйрәмгә кунаклар кайдан гына кайтмаган иде! Казан шәһәренең "Кәүсәр" мәчете имам-хатыйбы Наил хәзрәт, "Нурислам", "Салихҗан" мәчетләреннән хаҗия Нәкыя абыстай, "Мөхәммәдия" мәдрәсәсе мөгаллимәсе Флера Ханнанова, "Мөхәммәдия" шәкерте, Түбән Көек авылы егете Илшат Шәяхмәтов, Күңгәр, Бәрәскә, Арча районы Кышкар мәчете каршындагы "Балкыш" мәдрәсәсеннән балалар төркеме, авыл имамнары, район җитәкчелеге, төбәк халкы - барысы меңләгән халык. "Тукай" һәм "Уңыш" хуҗалыклары әзерләгән корбан ашлары бәйрәмгә тагын да ямь өстәде. Укылган вәгазьәр, азан, догалар Әләшәгә килүчеләрнең күңеленә илаһи нур булып иңде.