"Уңыш - 2011"

Бәйрәмдә Әтнә районы делегациясе дә катнашты. Коры сүзләр тоелмасын өчен башта ук әйтеп узыйк: авыл хуҗалыгы продукциясе җитештерү һәм сату өлкәсендә иң яхшылар арасында безнең район да бар иде. Чарада Татарстан Президенты Рөстәм Миңнеханов, Дәүләт Советы рәисе Фәрит Мөхәмәтшин, Премьер-министр урынбасары, авыл хуҗалыгы һәм азык-төлек министры Марат Әхмәтов, Казан мэры Илсур Метшин да катнашты. Тантанага республиканың иң яхшы терлекчеләре һәм механизаторлары чакырылган.

Татарстан Президенты: “Алдагы ел – сынаулар елы булды. Сезнең ярдәм белән агросәнәгать комплексын саклап кала алдык һәм агым­дагы елны уңыш­лар елы дип атарга була”, – диде.  Татарстанның авыл хуҗалыгы башка тө­бәкләрнекеннән тер­лек­челектәге югары потен­циалны саклап калуы бе­лән аерыла. Ә безнең район продукция алуны да арттыра бара.

Ма­рат Әхмәтов бил­ге­ләгәнчә, “Уңыш” бәй­рә­мен Авыл хуҗалыгы һәм җитештерү сәнәгате хез­мәт­кәрләре көне алдыннан билгеләү күңелле тра­дициягә әйләнеп бара. Быел сәбәбе дә җитди – республикада 5 млн. тоннадан артык икмәк җыеп алынды. Исегездәдер, Әтнә районы урып-җыю­ны тәмамлау турында Илбашы алдында бе­рен­че­ләрдән булып хисап тотты.

Баскет-Холлда зур уңыш­ларга ирешкән “Күшәр” ху­җалыгы җитәкче­се Рүзәл Хәй­руллин, “Зәб сукасы һәм көзге чәчү­” номинациясендә яхшы нә­тиҗәләргә иреш­кән “Шах­тер” хуҗалы­гы меха­низаторы Ренат Сибгатул­линны сәхнәгә чакырып бү­­ләкләделәр. “Таң” ху­­­җалыгы җитәкче­се Ал­­­маз Сибагатуллин, “Таш­­чишмә”дән савым­чы Фир­дания Һадиева, “Ле­нин”­ның баш бухгалтеры Фәридә Гарипова һәм шушы ук хуҗалык энер­гетигы Рәүф Вафин да аерым бүләкләргә лаек булдылар.

Соңыннан рес­пуб­ли­ка­ның иҗат коллективлары тарафыннан әзерләнгән бәйрәм концертын карадылар.